საიტზე მიმდინარეობს ტექნიკური სამუშაოები

საქართველო-ევროკავშირის ასოცირების ეკონომიკური და დარგობრივი თანამშრომლობის ქვეკომიტეტის მე-5 თემატური ჯგუფის სხდომა

2022 წლის 9 ივნისს, ქ. ბრიუსელში გამართულ საქართველო-ევროკავშირის ასოცირების ეკონომიკური და დარგობრივი თანამშრომლობის ქვეკომიტეტის მე-5 თემატური ჯგუფის შეხვედრაზე, ევროკავშირის მხარემ დადებითად შეაფასა საქართველოს პროგრესი ასოცირების შეთანხმების და ასოცირების დღის წესრიგის ფარგლებში საქართველოს მიერ ნაკისრი ვალდებულებების შესრულების კუთხით, სოფლის მეურნეობის, რეგიონალური განვითარების, საზღვრისპირა თანამშრომლობის, საზღვაო მმართველობისა და თევზჭერის პოლიტიკის მიმართულებით.

შეხვედრაზე განსაკუთრებით მაღალი შეფასება მიეცა იმერეთის რეგიონის „ჭკვიანი სპეციალიზაციის“ სტრატეგიის შემუშავების პროცესში მიღწეულ პროგრესს და აღინიშნა ქართული მხარის განსაკუთრებული ძალისხმევა და მზაობა ამ პროცესში. ასევე, ხაზი გაესვა სანიტარული და ფიტოსანიტარული სტანდარტების წარმატებით დანერგვას, ევროკავშირის ბაზარზე ქართული პროდუქციის ექსპორტის ხელშეწყობის კუთხით გაწეულ ძალისხმევას და გასულ წელს მიღწეულ შეთანხმებას, საქართველოში წარმოებული ლოკოკინებისთვის ევროკავშირის ბაზრის გახსნასთან დაკავშირებით. ასევე, აღინიშნა შავ ზღვაში თევზჭერის სტრატეგიის განვითარების მიმართულებით გაწეული ძალისხმევა და ქართული მხარის მზაობა 2023 წელს შავი ზღვის მაღალი დონის კონფერენციის მასპინძლობასთან დაკავშირებით. 

სხდომაზე ევროკავშირის მხარემ გამოხატა მადლიერება ქართული მხარის მიმართ ევროკავშირის სპეციალური კითხვარის უპრეცენდენტოდ მოკლე ვადებში შევსებისა და ევროკომისიისათვის მიწოდებისათვის.

სხდომას ქართული მხრიდან თავმჯდომარეობდა საგარეო საქმეთა სამინისტროს ევროკავშირის დახმარების კოორდინაციისა და სექტორული ინტეგრაციის დეპარტამენტის დირექტორი დავით ბუჯიაშვილი, ხოლო ევროკავშირის მხრიდან - ევროკავშირის საგარეო ქმედებათა სამსახურის მწვანე ტრანზიციის სამმართველოს ხელმძღვანელი ანნა სტრზასკა.

ქართული მხრიდან შეხვედრაში მონაწილეობას იღებდნენ საგარეო საქმეთა სამინისტროს, რეგიონული განვითარებისა და ინფრასტრუქტურის, გარემოს დაცვისა და სოფლის მეურნეობის სამინისტროსა და საზღვაო ტრანსპორტის სააგენტოს წარმომადგენლები, ხოლო ევროკავშირის მხრიდან, - ევროკომისიის, ევროკავშირის საგარეო ქმედებათა სამსახურისა და საქართველოში ევროკავშირის დელეგაციის წარმომადგენლები.